गोम्मटेस-थुदि

—————————————–
विसट्ट-कंदोट्ट-दलाणुयारं, सुलोयणं चंद-समाण-तुण्डं ।
घोणाजियं चम्पय-पुप्फसोहं, तं गोम्मटेसं पणमामि णिच्चं ॥
अच्छाय-सच्छं जलकंत गंडं, आबाहु दोलंत सुकण्ण पासं।
गइंद-सुण्डुज्जल-बाहुदण्डं, तं गोम्मटेसं पणमामि णिच्चं ॥
सुकण्ठ-सोहा जियदिव्व संखं, हिमालयुद्दाम विसाल कंधं।
सुपेक्ख णिज्जायल सुट्ठुमज्झं, तं गोम्मटेसं पणमामि णिच्चं ॥
विंज्झाय लग्गे पविभासमाणं, सिहामणिं सव्व-सुचेदियाणं।
तिलोय-संतोसय-पुण्णचंदं, तं गोम्मटेसं पणमामि णिच्चं ॥
लया समक्कंत-महासरीरं, भव्वावली लद्ध सुकप्परूक्खं ।
देविंदविंदच्चिय पायपोम्मं, तं गोम्मटेसं पणमामि णिच्चं।।
दियंबरो जो ण च भीड़ जुत्तो, ण चांबरे सत्तमणो विसुद्धो ।
सप्पादि जंतुप्फुसदो ण कंपो, तं गोम्मटेसं पणमामि णिच्चं ॥
आसां ण जो पोक्खदि सच्छदिट्ठि, सोक्खे ण बांछा हयदोसमूलं ।
विराय भावं भरहे विसल्लं, तं गोम्मटेसं पणमामि णिच्चं ॥
उपाहि मुत्तं धण-धाम-वज्जियं, सुसम्मजुत्तं मय-मोहहारयं।
वस्सेय पज्जंतमुववास-जुत्तं, तं गोम्मटेसं पणमामि णिच्चं ॥
(इति गोम्मटेस-थुदि)

*************************************************************************************